پھول مہکے تو بیابانوں کو گلزار کیا

پھول مہکے تو بیابانوں کو گلزار کیا

سب نے تھک ہار کے ہی عشق اختیارکیا

مستند میر کا فرمایا ہوا ہے اب تک

جس کوعطار کے اک لونڈے نے بیمار کیا

پیرِ غالب نے پری زادوں سے برہم ہو کر

انتقاماً وہاں حوروں کو شرمسار کیا

مبتلا ذوقِ بتاں میں رہا مومن بھی سدا

آخری وقت بھی علت کو روادار کیا

دیکھو ہمارے شاعروں نے عشق کیا کیا

مجنوں بنے رہے سبھی لیلیٰ کو کھو دیا

آتش کی آرزو کبھی پوری نہ ہو سکی

غالب غریب پاؤں کا بوسہ نہ لے سکا

مٹی میں میر مل گیا، محبوب نہ ملا

ناصر وصالِ یار کی حسرت میں مر گیا

ساری حیاتی داغ کو پیتی رہی شراب

ساغر فقیر چرس کے دھوئیں میں ٹھر گیا

پہلی سی دے سکا نہ محبت کسی کو پھر

آخر جنابِ فیض کا بھی پیٹ بھر گیا

کرتا رہا منیر بھی ہر کام دیر سے

کیونکہ گلے میں عشق و محبت کا طوق تھا

ظالم نہیں تھے شہر کے باسی مرے حضور

اس محترم کو آپ ہی مرنے کا شوق تھا

یہ بے مثال لوگ بھی کیا با کمال تھے

نغمات حسن و عشق لا زوال دے گئے

یہ تو بھلا ہو رومی و حالی کا دوستو

اردو کو ایسے عہد میں اقبال دے گئے

ظفر حسین