بند کمرے میں دہکتا ہوا ہیٹر تنہا
اپنی تنہائی میں جلتا ہے دسمبر تنہا
در و دیوار پہ یادوں کے ٹھٹھرتے سائے
مجھ کو سینے سے لگائے ہوئے بستر تنہا
سنگ باری پہ اترتا ہوا وحشی موسم
کرچیاں ہوتا ہوا کانچ کا پیکر تنہا
یخ ہواؤں سے جوانی کو چھپاتی کلیاں
اور ادھر رات کا زہریلا سمندر تنہا
ایک بچہ ہے محبت کی انگوٹھی کا نگیں
اور اک راہ میں پھینکا ہوا کنکر تنہا
شہر کی سڑکوں پہ لاشوں کا سفر جاری ہے
بین کرتے ہیں مگر کان میں ہُوٹر تنہا
چوٹیاں باندھ کے برفاب کفن تکتی رہیں
وادیاں روند گیا برف کا لشکر تنہا
اے مرے آئینہ رُو تُو بھی کبھی سامنے آ
کب تلک کھاؤں ترے شہر میں پتھر تنہا
یہ جو ہر وقت محبت کی اذاں دیتا ہے
دشتِ نفرت میں ہے تاؔباں ہی قلندر تنہا
عبدالقادر تاباں
No comments:
Post a Comment