جاتے ہوئے نشانی میں صدمات چھوڑ کر

 جاتے ہوئے نشانی میں صدمات چھوڑ کر

جاتا ہے کوئی یوں بھی بھلا ساتھ چھوڑ کر

تُو نے تو اسی ہاتھ کو تھاما تھا شوق سے

تو اب کہاں چلا ہے مِرا ہاتھ چھوڑ کر

ڈر ہے کہ میں بھی ورثے میں یہ چھوڑ جاؤں گی

ماں بھی مَری تھی ایسے ہی حالات چھوڑ کر

کیسے کروں گُزارا تِری دید کے بغیر

جاتا ہے کب فقیر بھی خیرات چھوڑ کر

خالی پیالی میز پہ اوندھی پڑی رہی

وہ اُٹھ گیا ادھوری ملاقات چھوڑ کر

ان کے لیے بھی شاعرو اک نظم تو لکھو

بیٹھے ہیں دفتروں میں جو برسات چھوڑ کر

ہیں تتلیاں بھی حُسن پرستی میں مُبتلا

پھُولوں کو چُومتی ہیں ہرے پات چھوڑ کر

ناہید اختر بلوچ