آ جاؤ اب تو زلف پریشاں کئے ہوئے
ہم راہ پر ہیں شمع فروزاں کئے ہوئے
مایوس قلب ہے تِری آمد کا منتظر
دہلیز پر نگاہ کو چسپاں کئے ہوئے
عہدِ وفا کو توڑ کے ہم بھی ہیں مضمحل
تم بھی ادھر ہو چاک گریباں کئے ہوئے
آؤ تو میرے صحن میں ہو جائے روشنی
مدت گزر گئی ہے چراغاں کئے ہوئے
بیٹھے ہیں تشنہ کام سرِ رہگزر تمام
ساقی تِری شراب کا ارماں کئے ہوئے
آ جاؤ کہ بہار ہے اپنے شباب پر
ابن چمن کے وصل کا ساماں کئے ہوئے
اشہد بلال چمن
No comments:
Post a Comment