نہ تیری یاد نہ وہ لطف آہ نیم شبی

 نہ تیری یاد، نہ وہ لطفِ آہِ نیم شبی

دل و دماغ ہوئے وقفِ رنجِ بے سببی

تِرے کرم نے کِیا یہ بھی اک ستم ہم پر

کہ چشمِ شوق نے سیکھی نہ مُدعا طلبی

غمِ نشاط کے ماروں کو کون سمجھائے

خُمارِ مے سے ہے بڑھ کر سرورِ تشنہ لبی

وہ خانہ زاد بہاراں ہے اس کو زیبا ہے

گُلاب پیرہنی، گُل رُخی، و غنچہ لبی

ہوس میں اک سخن رائیگاں کی وہ بھی گیا

متاعِ غُنچہ تھا جو اضطرابِ جاں بہ لبی

کوئی نظر نہیں شائستۂ سخن، ورنہ

وہی ہے چشم فسُوں گر کی گفتگو طلبی

مِرا وجود سہی ایک مُشتِ خاک، مگر

ہے ذرے ذرے میں اعلان کہکشاں نسبی

علی مینائی