ہر کارِ جاں طلب تِرا آساں کیے ہوئے
پھرتے ہیں خود سے خود کو گریزاں کیے ہوئے
اس دھج سے تیرے شہر میں آئیں گے اہلِ عشق
ہر زخمِ جاں کناں کو چراغاں کیے ہوئے
اب جشنِ عہدِ ہجر مناتے ہیں اس طرح
طاقِ نگہ پہ اشک فروزاں کیے ہوئے
کیا خوب حسنِ رہزنی ہے میرے یار کا
وا چشمِ ناز پر درِ مژگاں کیے ہوئے
رسمِ جفا کے تحت مجھے چھوڑنے سے قبل
رکھنا ذہن میں وعدہ و پیماں کیے ہوئے
لب ہائے گل کو سرخئ گلشن سے سینچ کر
مہ تاب سے جبیں کو نگاراں کیے ہوئے
غنچوں کی شوخیوں سا تبسم کا بانکپن
پھولوں کو ہونٹوں سے ذرا افشاں کیے ہوئے
ہم وہ اسیرِ عشق کہ مدت سے یاد کا
آباد وحشتوں سے بیاباں کیے ہوئے
بیدل، غنی، کلیم سے رغبت بہت سہی
پر میر کی طرح ہیں گریباں کیے ہوئے
غالب کی مثل بے وجہ رکھتے ہیں خود کو ہم
آشفتہ و ملول و پریشاں کیے ہوئے
جب سے سخن سرا ہوئے ہیں حمزہ ہاشمی
رہتے ہیں خود کو سوز نمایاں کیے ہوئے
حمزہ ہاشمی سوز
No comments:
Post a Comment