رہ الفت میں اک دن یہ گھڑی آئی تو کیا ہو گا

 رہِ الفت میں اک دن یہ گھڑی آئی تو کیا ہو گا

خرد نے عشق کی پوشاک پہنائی تو کیا ہو گا

یہ بحرِ عشق ہے گہرائی عاشق ہی سمجھتا ہے

بنو جو دور ساحل پہ تماشائی تو کیا ہو گا

جو چل نکلا ہے کب کا اک بگولے کے تعاقب میں

وہ پیاسا بن گیا صحرا کا شیدائی تو کیا ہو گا

برستی ہے ہمیشہ جس کے غم میں چشمِ تر میری

گھٹا بن کر وہ میرے ذہن پر چھائی تو کیا ہو گا

وہ جس کی عقل و دانش پر تحفظ ہے تمہیں لاحق

اسی نےبات آخر تم کو سمجھائی تو کیا ہو گا

میں اپنی کشتیٔ دل جس میں جا کر چھوڑ آیا ہوں

ڈبو دے جھیل سی آنکھوں کی گہرائی تو کیا ہو گا

وہ جس سے پیار کرنے پر ہوئے توحید کے قائل

وہی نکلا محبت میں جو ہرجائی تو کیا ہو گا

خبر پیارے وطن کی اس لئے میں سن نہیں پاتا

طبیعت دکھ کی یہ شدت نہ سہہ پائی تو کیا ہو گا

بہت مشکل سے میں نے ضبط کے دامن کو تھاما ہے

تِری یادوں نے گر چھینی شکیبائی تو کیا ہو گا

رہے گا مان پھر کیسا ہوا کی تندی تیزی کا

جو اک چھوٹا دیا تک نہ بجھا پائی تو کیا ہو گا

زبیدہ نے خریدی ہے جو جنت تم نے ٹھکرائی

بَعِوضِ سلطنت بھی کل نہ ہاتھ آئی تو کیا ہو گا

نکل بیٹھے ہو جس کو ڈھونڈنے صحرا و جنگل میں

تمہاری شہ رگ سے وہ صدا آئی تو کیا ہو گا

ہر اک دکھ کی دوا کرنے مسیحا آ تو جائے گا

نہ بھایا تم کو اندازِ مسیحائی تو کیا ہو گا

ایاز مفتی