کیا زمیں کیا آسماں کچھ بھی نہیں

 کیا زمیں کیا آسماں کچھ بھی نہیں

ہم نہ ہوں تو یہ جہاں کچھ بھی نہیں

دیدہ و دل کی رفاقت کے بغیر

فصلِ گل ہو یا خزاں کچھ بھی نہیں

پتھروں میں ہم بھی پتھر ہو گئے

اب غمِ سود و زیاں کچھ بھی نہیں

کیا قیامت ہے کہ اپنے دیس میں

اعتبارِ جسم و جاں کچھ بھی نہیں

کیسے کیسے سر کشیدہ لوگ تھے

جن کا اب نام و نشاں کچھ بھی نہیں

ایک احساسِ محبت کے سوا

حاصل عمر رواں کچھ بھی نہیں

کوئی موضوع سخن ہی جب نہ ہو

صرف اندازِ بیاں کچھ بھی نہیں

آفاق صدیقی