رہے گا دن کا تصور نہ شہرِ شب کا وجود
مٹے گا موج قیامت میں اب کے سب کا وجود
یہ وہ ادب ہے جسے گردباد کہتے ہیں
یہاں تلاش نہ کر دوستا ادب کا وجود
وہ سبز جھیل سی آنکھیں وہ سرخ پھول سے لب
تیرا وجود ہے جاناں بڑے غضب کا وجود
اب آ بھی جائیں بہاریں تو کیا غرض مجھ کو
مٹا چکا ہوں میں اپنی ہر اک طلب کا وجود
اے کوزہ گر یہ نہیں لازمی کہ روز بگاڑ
مجھ ایسے کمتر و بے کار و بے سبب کا وجود
نبھا رہا ہوں یہ سانسیں کسی کے کہنے پر
وگرنہ پھونک چکا ہوتا میں بھی کب کا وجود
اسے نہ پھینک سمندر کے پانیوں میں علی
کہ یہ وجود تو لگتا ہے مستحب کا وجود
نہیں وہ گرچہ مجسم مگر علی قیصر
ہر اک مقام پہ دیکھا ہے ہم نے رب کا وجود
علی قیصر رومی
No comments:
Post a Comment