دشت میں جو بھی ہے جیسا مرا دیکھا ہوا ہے

 دشت میں جو بھی ہے جیسا مِرا دیکھا ہوا ہے

راستہ اس کے سفر کا مرا دیکھا ہوا ہے

کس لیے چیختا چنگھاڑتا رہتا ہے بہت

موج در موج یہ دریا مرا دیکھا ہوا ہے

وقت کے ساتھ جو تبدیل ہوا کرتا ہے

آئینہ آئینہ چہرا مرا دیکھا ہوا ہے

کس طرح تجھ کو یہ بتلاؤں ہوا کے جھونکے

ریت پر لکھا ہے کیا کیا مرا دیکھا ہوا ہے

کس جگہ کون گڑا ہے مجھے معلوم ہے سب

اس ترے شہر کا نقشہ مرا دیکھا ہوا ہے

رات کے بعد سحر ہوتی ہے روشن تنویر

ہے اندھیرے میں اجالا مرا دیکھا ہوا ہے

تنویر سامانی