پچھلا دور بھی ویسے کتنا اچھا تھا
پیار وغیرہ فلموں میں ہی ہوتا تھا
کھانے کی ضِد کرتی ماں کو کیا معلوم
اس کا بیٹا کیا کچھ کھو کر آیا تھا
زہر کی شیشی کھولنے والے بُھول گئے
تُو نے بھی اک شخص کو زندہ چھوڑا تھا
یا رب تیرا حکم مِری سر آنکھوں پر
لیکن اس کا میرا ہونا بنتا تھا
اب اتنا محسوس نہیں ہوتا مجھ کو
پہلے پہل میں جذباتی ہو جاتا تھا
نئے مچھیروں کے آنے سے کچھ پہلے
دریا میری ساری باتیں سُنتا تھا
محسن ظفر ستی
No comments:
Post a Comment