شام ہے اے پری جمال پلا

 شام ہے، اے پری جمال پلا 

جیب سے مے کدہ نکال، پلا 

زرد ہے محتسب کا رخ ساقی 

شے کوئی اس کو لال لال، پلا 

آج میں بے پیۓ نہیں ٹلتا 

آج اے مہ جبیں! نہ ٹال، پلا 

بطنِ مینا سے ہی نہ بھر ساغر 

کچھ نظر سے بھی آج ڈال، پلا 

آخر آخر ڈبو کے دم لینا 

اول اول بہ اعتدال، پلا 

مے میں کل رات جو ڈبوئے تھے 

زُلف سے وہ کنول نکال، پلا 

بند کلیوں کو کھولنا ہے اگر 

ان کو کچھ تابش ہلال، پلا 

احمریں انکھڑیوں کے ڈوروں سے 

رنگ تھوڑا سا اے غزال، پلا 

آج کوئی کمی عدم نہ رہے 

دو جہاں ساغروں میں ڈھال، پلا 

عبدالحمید عدم