ہے ثبت تری ذات سے تاریخ بشر میں

عارفانہ کلام نعتیہ کلام

ہے ثبت تریﷺ ذات سے تاریخِ بشر میں

وہ عزم جو تھکتا نہیں طائف کے سفر میں

تُوﷺ نورِ ازل تاب سرِ مطعِ تخلیق

فیضانِ ضیا تجھ سے ہے دامانِ سحر میں

خورشید کے کاسے میں عطا تیری ضیا کی

خیرات تِرے نور کی کشکولِ قمر میں

تُوﷺ سارے جہانوں کے لیے مژدۂ رحمت

احوال زمانوں کے سبھی تیری نظر میں

درپیش ہے بے سمت مسافت کی اذیت

اس دور کا انسان ہے دانش کے بھنور میں

حیراں ہے تِریﷺ شانِ توکل پہ زمانہ

چولھا بھی نہ جلتا تھا مہینوں تِرے گھر میں

اشکوں کو زمیں پر بھی میں گرنے نہیں دیتا

سرمایہ تِریﷺ یاد کا ہے دیدۂ تر میں

انور میرے دیوان میں ہے نعتِ پیمبرﷺ

کیا توشۂ عقبٰی ہے مِرے رختِ سفر میں

انور مسعود