میرے نبی کا ہے رخ زیبا بھی روشنی

 عارفانہ کلام حمد نعت مقبت

میرے نبیؐ کا ہے رخِ زیبا بھی روشنی

سرکارؐ کا ہے اسوۂ حسنہ بھی روشنی

سورج اُگے ہوئے ہیں حروفِ سپاس میں

نعتِ نبیﷺ کا مصرعِ تنہا بھی روشنی

توصیفِ مصطفیٰؐ کی کتابِ سخن ہے نور

لوحِ ثناء کے لفظ کا نقطہ بھی روشنی

نسبت مِرے حضورؐ کی صد رشکِ آفتاب

حسنِ ادب کا رمز و کنایہ بھی روشنی

اُنؐ کے طفیل عظمتِ مکہ بھی معتبر

اُنؐ کے طفیل اُنؐ کا مدینہ بھی روشنی

زنجیر ہے غلامیٔ سرکارﷺ کی سند

زنجیر کا ہر ایک ہے حلقہ بھی روشنی

رکھنا جبیں کو ضبط کی محراب میں کہ ہے

ایک ایک سجدہ میرے قلم کا بھی روشنی

حرفِ درودﷺ لب پہ لکھے کلکِ خوشنوا

صلِ علیٰﷺ کا سرمدی نغمہ بھی روشنی

دیوار و در بھی شہر کی گلیوں کے ماہتاب

قرب و جوارِ گنبد خضرا بھی روشنی

جو روشنی فصیل ہے شہرِ حضورؐ کی

اس روشنی کو دیکھنے والا بھی روشنی

ہر طاقِ حرف میں بھی رکھو چشمِ تر مری

اشکِ رواں کا آئینہ خانہ بھی روشنی

کیا ذکر اہلِ بیت کا، ہے آپؐ کے طفیل

عشقِ نبیﷺ کا کوہِ ہمالہ بھی روشنی

کیسے غبارِ شب کا تصور کوئی کرے

جب ہے صبا کے ہاتھ کا نامہ بھی روشنی

لوح و قلم بھی نور کے پیراہنوں میں ہیں

ہر لفظ کے ہے سر کا عمامہ بھی روشنی

حاصل ہوئی ہے نسبتِ آقاؐ اسے، ریاض

دستِ نبیؐ میں میرا عریضہ بھی روشنی

ریاض حسین چودھری