اس خرابے میں بھی خوش بنیاد رکھتا ہے مجھے

 عارفانہ کلام حمد نعت منقبت

اِس خرابے میں بھی خوش بنیاد رکھتا ہے مجھے

اک غلامی کا شرف آزاد رکھتا ہے مجھے

رشتۂ الحمد ہے میرے اور اس کے درمیاں

شکر کے لمحوں میں کوئی یاد رکھتا ہے مجھے

ذکر ہے جس کا اسی کی مہرِ خاتمؐ ہے بہت

کیا ہوا جو یوں کوئی بیداد رکھتا ہے مجھے

بولتا ہوں تو صدا آتی ہے اس کی، مرحبا

وہ سرِ کُوئے سخن آباد رکھتا ہے مجھے

تاکہ کچھ اپنی بھی باتیں ہوں ہمارے درمیاں

مجلسِ شب میں وہ سب کے بعد رکھتا ہے مجھے

میرا یک اک لفظ اصلاً اس کی ہی تائید ہے

کوئی ہے جو فارغ اَز اضداد رکھتا ہے مجھے

اس کے دم سے اڑتا پھرتا ہوں افق سے تا افق

شانۂ شب خود پہ اختر لاد رکھتا ہے مجھے

اختر عثمان