کہا کب صنم یا خدا مسئلہ ہے

 کہا کب صنم یا خُدا مسئلہ ہے

زمانے سے اپنا جدا مسئلہ ہے

چراغوں نے مجھ سے بس اتنا کہا تھا

اندھیرے میں اندھی ہوا مسئلہ ہے

تِرا ہاتھ ہاتھوں میں ہو گر ہمارے

کہاں پھر کوئی مسئلہ، مسئلہ ہے

کوئی مسئلہ حل نہ رونے سے ہو گا

ذرا گُنگُنا کر بتا، مسئلہ ہے

پریشاں کھڑا ہوں اسی موڑ پر یوں

پرانا بھی مجھ کو نیا مسئلہ ہے

محبت میں ایسی جگہ ہوں جہاں پر

تِرا مسئلہ بھی مِرا مسئلہ ہے

یہاں جینا لازم وہاں مرنا لازم

فنا مسئلہ ہے، بقاء مسئلہ ہے

فقط نام کا اب ہے ایمان باقی

یقیں مسئلہ ہے، دعا مسئلہ ہے

بلانے پہ میرے وہ کس سادگی سے

اسد پوچھتے ہیں کہ؛ کیا مسئلہ ہے

عمران اسد