تنہا تھی اور ہمیشہ سے تنہا ہے زندگی

فلمی گیت

تنہا تھی اور ہمیشہ سے تنہا ہے زندگی

ہے زندگی کا نام، مگر کیا ہے زندگی

تنہا تھی اور ۔۔۔۔۔۔۔۔۔۔۔۔

یاں پھول آرزوؤں کے کھِلتے نہیں کبھی

بچھڑے جو ایک بار وہ ملتے نہیں کبھی

سنسان راستوں کا تماشا ہے زندگی

تنہا تھی اور ۔۔۔۔۔۔۔۔۔۔۔۔

ہر شمع کے نصیب میں ہے درد کا دھواں 

ہر پھول کی ہنسی میں چھپا ہے غمِ خزاں

ریشم حسین خواب ہے، شعلہ ہے زندگی

تنہا تھی اور ۔۔۔۔۔۔۔۔۔۔۔۔

سورج کو آنسوؤں کے سمندر میں پھینک دوں

جو میرا بس چلے تو ستاروں کو نوچ لوں 

جھوٹے ہیں سب چراغ اندھیرا ہے زندگی

تنہا تھی اور ۔۔۔۔۔۔۔۔۔۔۔۔

صہبا اختر