دنیا سمجھ رہی تھی سہارے مرے لئے

 دنیا سمجھ رہی تھی سہارے مِرے لیے

لیکن بنے تھے بوجھ کنارے مرے لیے

اس کو خبر نہ تھی میں حقیقت پسند ہوں

وہ کہہ رہا تھا لائے گا تارے مرے لیے

آنکھوں میں اس کی کتنی محبت دکھائی دی

ڈالی سے جس نے پھول اتارے مرے لیے

اس کو کبھی نہ دینا کوئی دکھ مرے خدا

لکھ دے جہان بھر کے خسارے مرے لیے

دیکھو کبھی گریں نہ یہ پلکوں کی باڑ سے

جتنے بھی اشک ہیں یہ تمہارے، مرے لیے

ناہید تیرگی سے دل اُکتا گیا مرا

کوئی تو آفتاب ابھارے مرے لیے

ناہید کیانی