کسی کی یاد کا سینے سے سم نکالتے ہیں

 کسی کی یاد کا سینے سے سَم نکالتے ہیں

ہم اپنی سانس بھی اس وقت کم نکالتے ہیں

نہ پوچھ کیسے اذیت میں رات کٹتی ہے 

جب اپنی آنکھ کے ہم اشکِ غم نکالتے ہیں

سفر میں دھوپ کی شدت بھی کیا کرے ان کا 

مکانِ دل سے جو سایہ بہم نکالتے ہیں

ہمیشہ چادرِ افلاک چھوٹی پڑتی ہے

جب اپنی ذات سے باہر قدم نکالتے ہیں

وہ بار بار نظر سے اتارتی ہے نظر

ہم اپنی جان کا صدقہ بھی کم نکالتے ہیں

جدید شعر پرانی زمین، قافیے سے

وہ کوئی اور نہیں صرف ہم نکالتے ہیں

خدا بھی ساتھ ہی رہتا ہے خانہ دل میں

تو لوگ کعبے سے کیونکر صنم نکالتے ہیں

یہ خاندانِ اسامہ کی پرورش ہے امیر 

ہمارے بچے بھی گھر سے علم نکالتے ہیں

اسامہ امیر