اے چشم فسوں ساز فسانے ہیں بہت سے

 اے چشمِ فسوں ساز فسانے ہیں بہت سے

لگتا ہے تِری زد پہ نشانے ہیں بہت سے

تجدیدِ تعلق کے بھی رستے نہیں مسدود

اور چھوڑنا چاہو تو بہانے ہیں بہت سے

ہر ایک کی قسمت میں نہیں وقت پہ مرنا

اس دل نے ابھی رنج اُٹھانے ہیں بہت سے

تعمیر کا سوچو گے تو محفوظ رہو گے

توڑو گے تو پھر آئینہ خانے ہیں بہت سے

اک تو یہ ہوا مجھ سے خدا رُوٹھ گیا ہے

اس پر یہ ستم لوگ منانے ہیں بہت سے

باتوں میں لگا کر اسے لانا ہے سحر تک

قصے شبِ ہجراں کو سنانے ہیں بہت سے

وہ موج میں آیا تو بدل ڈالے گا دنیا

درویش کے کاسے میں زمانے ہیں بہت سے

اسد رحمان