متاع شوق تو ہے درد روزگار تو ہے

 متاعِ شوق تو ہے دردِ روزگار تو ہے

اگر بہار نہیں عشرتِ بہار تو ہے

ادائے چاکِ گریباں سے با خبر نہ سہی

جنونِ شوق کو فردا کا اعتبار تو ہے

ترس رہے ہیں دل و جاں جو رنگ و بُو کیلئے

مِرے نصیب میں اک دشت انتظار تو ہے

کہاں نصیب ہوس کو جنوں کی آرائش

لہو لہو ہے گریبان تار تار تو ہے

ان آبلوں کو حقارت سے دیکھنے والے

ان آبلوں سے چمن کا تِرے وقار تو ہے

ہزار طرح سے رُسوا ہیں اہلِ درد تو کیا

تِرا دیار تو ہے تیرا رہ گزار تو ہے

حیات تلخ سہی روز و شب حرام سہی

دل و نظر کو یہ ماحول سازگار تو ہے

عرشی بھوپالی