کہیں پیدا میری خاطر کوئی مشکل نہ ہو جائے

 کہیں پیدا میری خاطر کوئی مشکل نہ ہو جائے

پریشاں ہوں یہ میرا دل کہیں بزدل نہ ہو جائے

بھنور میں میری کشتی کو یہی احساس رہتا ہے

ڈبونے میں میرا یہ ناخدا شامل نہ ہو جائے

اسی اک خوف سے میں اپنی پلکیں تک نہیں جھپکوں

کہ اس کا چہرہ آنکھوں سے میری اوجھل نہ ہو جائے

مجھے اس بات کی ہر لمحہ اتنی فکر رہتی ہے

کہ اس کی یاد سے میرا یہ دل غافل نہ ہو جائے

کبھی اس کی جفاؤں کی شکایت کرنا بھی چاہوں

مگر پھر سوچتی ہوں وہ کہیں بے دل نہ ہو جائے

بھلا تھک ہار کر بیٹھوں روبینہ تو کہاں بیٹھوں؟

جسے میں چھوڑنا چاہوں میری منزل نہ ہو جائے

روبینہ میر