دوسرا کنارا بھی بے وفا کنارا ہے

 دوسرا کنارا بھی بے وفا کنارا ہے

اب تو ڈوب جانا ہی آخری سہارا ہے

میں اتر نہیں سکتا دوسرے کنارے پر

دوسرا کنارا تو دوسرا کنارا ہے

مجھ پہ اب محبت میں زہر پینا واجب ہے

میں نے دل نہیں ہارا حوصلہ بھی ہارا ہے

آسماں کی وسعت میں جانے اب کہاں ہو گا

وہ جو میری قسمت کا بے خبر ستارا ہے

وقت کی عدالت کا فیصلہ یہی ہے اب

میں بھی اک خسارا ہوں تو بھی اک خسارا ہے

دوسرے کنارے پر یہ خبر ہوئی مجھ کو

وہ تو اس کہانی میں تیسرا کنارا ہے

میں نے تیرے حصے کے رتجگے بھی کاٹے ہیں

میں نے تیرے حصے کا قرض بھی اتارا ہے

اسحاق وردگ