جدائی نے تری بے چین سا پھر رات بھر رکھا

 جدائی نے تِری بے چین سا پھر رات بھر رکھا

خیالوں میں تِری بانہوں کے تکیے پہ جو سر رکھا

بہت تنہا سی لگتی تھی تِرے جانے سے محفل تو

میں بھی یہ سوچ کر اٹھا کیا ہے اب ادھر رکھا

مکاں تو بن گیا لیکن نہ جو تم رہ سکے اس میں

ابھی تک اس لیے اس کا نہیں ہے نام گھر رکھا

محبت کرنے والوں کا یہی شیوہ یہی مسلک

دیارِ عشق میں سب نے نگوں اپنا ہی سر رکھا

یوں جاؤتم نہ محفل میں خدارا ہوکےبےپردہ

کہیں گے شعر زلفوں پہ جو خالی تم نے سر رکھا

ٹھہرتا ہی نہیں کوئی جو آتا ہے گزرتا ہے

زمانے بھر نے دل میرا ہے مثلِ رہ گزر رکھا

چلے آؤ کہ تنہا ہوں دل و جاں سب ہی خالی ہیں

نہیں خالی مکانوں میں کسی کا اب ہے ڈر رکھا

شکایت یہ نہیں اس وقت کیوں بچھڑاہے وہ مجھ سے

گِلہ یہ ہے کہ سب باتوں سے مجھ کو بے خبر رکھا

تو پھر کیا تیر سینے سے نظر کے پار ہوتے ہیں

نہیں کچھ بھی ہے دنیا میں خدا نے بے ہنر رکھا

ستمگر آزما خود کو کہ دیکھوں حوصلہ تیرا

اِدھر رکھا ہے دل میرا اُدھر میرا جگر رکھا

اگر ہو یہ اجازت پھر تو پوچھوں باغباں سے میں

کہ کیوں میرا ہی گلشن پھر سے تم نے بے ثمر رکھا

جو کرتا ہوں پلٹ کر پھر وہ میرے پاس آتی ہیں

دعاؤں میں نہیں میری کوئی بھی تو اثر رکھا

بہت ہے پر خطر یہ عشق میں سمجھائے دیتا ہوں

بہت پچھتاؤ گے تشنہ! قدم تم نے اگر رکھا 

عامر شہزاد تشنہ