شمس یک رُت بھلا تا حشر چلے گا، نئیں نا
ایک ہی راز کئی بار کھلے گا، نئیں نا
فصل کی کوکھ میں بالک سا محبت کا جسد
دِید کے دودھ کے بِن خود سے پلے گا، نئیں نا
روزِ محشر پہ محبت کا نتیجہ رکھوں
وعدہ کرتا ہے ازالے میں ملے گا، نئیں نا
میں شریعت سے اگر ہٹ کے تجھے اپنا لوں
تو جہنم میں مِرے ساتھ جلے گا، نئیں نا
تیری قربت کے سہارے پہ اکڑتا ہوا شخص
تجھ سے بچھڑا تو وہ پاؤں پہ چلے گا، نئیں نا
مجھ سا آوارہ جسے مڑ کے تو دیکھے، ہنس دے
نقش پا پر تِرے چلنے سے ٹلے گا، نئیں نا
جس کو ہر شام کئی لوگ مسلسل دیکھیں
کیا وہ سورج مِرے پہلو میں ڈھلے گا، نئیں نا
مجھ کو دو زیست ہیں درکار علی اس کے لیے
عمر یکتا میں نصیب اپنا پھلے گا، نئیں نا
علی پیر عالی
No comments:
Post a Comment