کیوں پریشان کل خدائی ہے

 کیوں پریشان کُل خدائی ہے

کیسی آفت جہاں میں آئی ہے

وہ کہاں جائیں جن کا گھر ہی نہیں

گھر میں رہنا اگر بھلائی ہے

حسبِ دستور فاصلہ رکھیں

یہ وفا ہے نہ بے وفائی ہے

دور کرتا ہے وہ تمہیں مجھ سے

نام اتوار کا جدائی ہے

ہاتھ دھو کر پتہ چلا ہم کو

ہم نے پھر زندگی کمائی ہے

اپنے چہرے پہ تم نقاب رکھو

یہ شریعت نہیں دوائی ہے

یہ جو دنیا میں ہو رہا ہے رضا

کیا قیامت کی رونمائی ہے

رضا حیدری