شب حیات میں قندیل آرزو ترا غم

 شبِ حیات میں قندیلِ آرزو تِرا غم 

سکوتِ جاں میں فروزاں صدائے ہو ترا غم 

رمِ نفس میں مچلتی ہوئی صدا ترا نام 

رگِ گلو میں سلگتا ہوا لہو ترا غم 

حریمِ ذات میں روشن چراغ کے مانند 

ریاضِ شوق میں نخلِ سبک نمو ترا غم 

مِرے شعور کے زنداں میں اک دریچۂ نور 

مِرے وجود کے صحرا میں آبجو ترا غم 

لگن کوئی بھی ہو عنوان جستجو ترا حسن 

سخن کسی سے ہو موضوع گفتگو ترا غم 

سرور و کیف کی سب محفلوں میں دیکھ لیا 

کہیں شراب تِرا غم، کہیں سبو ترا غم 

خیال و فکر کے سب مکتبوں میں پوچھ لیا 

متاعِ دانش و تحقیق و جستجو ترا غم 

سکونِ قلب جو سوچا تو سر بسر تری یاد 

نشاطِ زیست کو دیکھا تو ہو بہو ترا غم 

غمِ جہاں، غمِ جاناں، غمِ دگر، غمِ خویش 

جہانِ غم میں ہر اک غم کی آبرو ترا غم 

ہر ایک رنج سے گزرے ہر اک خوشی سے گئے 

لیے پھرا جنہیں اک عمر کو بکو ترا غم 

رہی نہ کوئی بھی حسرت کہ رکھ دیا میں نے 

ہر ایک جذبۂ دل کش کے روبرو ترا غم 

علی مینائی