کھنکنے والی مٹی سے بنا ہوتا نہیں ہے
دلِ نغمہ نما نغمہ سرا ہوتا نہیں ہے
ہم اپنی اپنی مرضی کے دنوں میں جی رہے ہیں
خیالوں کا کوئی پَل نا رسا ہوتا نہیں ہے
یہ تم جو گیان کے پَل کے لیے کم دسترس ہو
یہ سونا پانو کے آگے پڑا ہوتا نہیں ہے
ہجومِ مُردگاں سے بھی گزرنا سہل ہے کیا
بنانا پڑھتا ہے رستہ ، بنا ہوتا نہیں ہے
میں جس پَل سے کسی خواہش کا پتھر توڑتا ہوں
وہ تیشہ کب مِرے دل میں گڑا ہوتا نہیں ہے
مِری آنکھوں میں حیرت اپنی آنکھیں کھولتی ہے
نظر آتا ہے وہ جو رُونما ہوتا نہیں ہے
لہو کے پیڑ پر نیت کِھلی رہتی ہے اس کی
میاں! یہ عشق ہے اور یہ قضا ہوتا نہیں ہے
کبھی رہنے بھی دے سکتا ہے دل سب کچھ سلامت
یہ ہاتھی ہر دفعہ ضد پر اڑا ہوتا نہیں ہے
مِری یہ آنکھ کب دیکھے ہوئے کو دیکھتی ہے
جو میں لکھتا ہوں، وہ پہلے لکھا ہوتا نہیں ہے
وہ دشمن ہے تو پھر اس پر نظر رکھنی پڑے گی
لڑائی میں کوئی چھوٹا بڑا ہوتا نہیں ہے
میں ہر ہر لفظ میں رکھتا ہوں اپنی سانسں شہزاد
مِرا مصرع یونہی اتنا ہرا ہوتا نہیں ہے
شہزاد اظہر
No comments:
Post a Comment