خوئے غم دل کو ہے یعنی حس غم کچھ بھی نہیں

 خوئے غم دل کو ہے یعنی حس غم کچھ بھی نہیں

کیا ہے اب کار گہہ ناز و ستم کچھ بھی نہیں

روزِ فریاد سے مغلوب نہیں طاقتِ شکر

جبر تقدیر و گراں بارئ غم کچھ بھی نہیں

زندگی مژدۂ غم،۔ موت نویدِ غمِ نو

کوئی روداد بہ ہر شانِ کرم کچھ بھی نہیں

اک طرف حشر میں تو ایک طرف بحرِ کرم

دامنِ تر تو اب اے دیدۂ نم کچھ بھی نہیں

درخورِ بے خودئ دل نہ الم ہے نہ سرور

زہرِ غم کچھ بھی نہیں ساغرِ جَم کچھ بھی نہیں

فرقِ ظرفِ دل و پیمانۂ تقدیر نہ پوچھ

اس نے بھرپور دیا اور اسے غم کچھ بھی نہیں

کیا خبر کیا ہے یہ ہنگامۂ ہستی مانی

ہم کو اتنا تو ہے معلوم کہ ہم کچھ بھی نہیں

مانی جائسی