بس وہی شخص تو مجھ کو درکار تھا

 بس وہی شخص تو مجھ کو درکار تھا

جس کا ملنا ہی اک کارِ دشوار تھا

پوچھتے ہیں سبھی کیا مجھے پیار تھا

ہاں مجھے پیار ہے ہاں مجھے پیار تھا

روپ اس کا جدا اک زمانہ فدا

کیا بتاؤں کہ کیسا وہ دلدار تھا

اس کی آنکھوں میں اقرار کی تھی چمک

اس کے ہونٹوں پہ حالانکہ انکار تھا

میری ہر بات چپ چاپ سنتا گیا

کیا خبر متفق تھا کہ بے زار تھا

میں سمجھتی رہی پیار کو زندگی

اور اس کے لیے کار بے کار تھا

خود کو ساگر بنایا تھا اس کے لیے

اور وہ تھا کہ پہلے سے سرشار تھا

میری پلکوں پہ پھر جھلملانے لگا

وہ ستارہ کبھی میرا غمخوار تھا

بات بے بات مجھ سے الجھنے لگا

کل تلک وہ جو میرا پرستار تھا

اشک تھے رات تھی اور بس یاد تھی

میرا زادِ سفر ہجر آزار تھا

ہر صدا بے اثر لوٹ کر آ گئی

جیسے وہ شخص تو کوئی دیوار تھا

بے کفن تھا جنازہ مرے خواب کا

ایسے اجڑا مرے دل کا دربار تھا

چھوڑئیے آپ یونہی پریشاں ہوئے

کچھ نیا تو نہیں میرے سرکار تھا

تو پشیماں نہ ہو میرے قاتل صنم

یہ گلہ تو نہیں یہ تو اظہار تھا

آج بھی اس کی ہی منتظر ہے غزل

جو بھی جیسا بھی ہے وہ مِرا پیار تھا

رقیہ غزل