محفلِ ناز میں جلوؤں سے پگھل جاتے ہیں لوگ
اس کے مبہم سے اشاروں سے بہل جاتے ہیں لوگ
کس طرح موم کے پیکر میں ہی ڈھل جاتے ہیں لوگ
اور وعدوں کی حرارت سے پگھل جاتے ہیں لوگ
ہم سیہ شب میں امیدوں کے جلاتے ہیں چراغ
کچھ تو موسم کے بدلتے ہی بدل جاتے ہیں لوگ
میں ہی قائل نہیں اک سرمئی جھیل آنکھوں کا
دور سے دیکھ کہ ریشم ساپھسل جاتے ہیں لوگ
ضد کیا کرتے ہیں چھونے کو دھنک رنگ کبھی
کبھی تتلی کے پروں سے بھی بہل جاتے ہیں لوگ
بن کے ہمدرد چلے آتے ہیں سمجھانے مجھے
باتوں باتوں میں مگر زہر اگل جاتے ہیں لوگ
عہد و پیماں بھی بھلا دیتے ہیں اکثر الماس
ڈال عادت ،جو فسانے سے نکل جاتے ہیں لوگ
الماس کبیر جاوید
No comments:
Post a Comment