ایک لڑکی تھی
مِرا بستہ پکڑ کے
اور دروازے کے پیچھے
کھینچ کر مجھ کو
مِرے بستے سے اس نے
گاچنی مٹی چُرائی تھی
کتر کے دانت سے مٹی
وہ مسکرائی تھی
مِرے گالوں پہ
بوسہ لے کے بولی تھی
مجھے دے دے یہ مٹی
مجھ کو تختی پوت کر
ایک نام لکھنا ہے
وہ کوئی حاملہ ہو گی
ماں نے مجھے بتایا تھا
میں شاید چھ برس کا تھا
میں اب چھپن برس کا ہوں
میں بھی اب حاملہ ہوں
یاد سے اس کی
وہ لڑکی اب بھی
مجھ کو یاد آتی ہے
گلزار
No comments:
Post a Comment