رنگ اردو Rung E Urdu: تم یاد مجھے آ جاتے ہو

Wednesday, 13 July 2022

جب صحنِ چمن میں کلیاں کھل کر پھول کی صورت ہوتی ہیں

اور اپنی مہک سے ہر دل میں ایک تخمِ لطافت بوتی ہیں

تم یاد مجھے آ جاتے ہو

جب برکھا کی رُت آتی ہے، جب کالی گھٹائیں اُٹھتی ہیں

جس وقت کہ رندوں کے دل سے ہوحق کی صدائیں اُٹھتی ہیں

تم یاد مجھے آ جاتے ہو

جب مینہ کی پھواریں پڑتی ہیں، جب ٹھنڈی ہوائیں آتی ہیں

جب صحنِ چمن سے گھبرا کر پی پی کی صدائیں آتی ہیں

تم یاد مجھے آ جاتے ہو

جب چودھویں شب کا چاند نکل کر دہر منوّر کرتا ہے

جب کوئی محبت کا مارا کچھ ٹھنڈی سانسیں بھرتا ہے

تم یاد مجھے آ جاتے ہو

جب رات کی ظلمت گھٹتی ہے، جب صبح کا نور اُبھرتا ہے

جب کوئل کوکو کرتی ہے، جب پنچھی پی پی کرتا ہے

تم یاد مجھے آ جاتے ہو

جب کوئی کسی کا ہاتھ پکڑ کر سیر کو باہر جاتا ہے

جب کوئی نگاہِ شوق کے آگے رہ رہ کر گھبراتا ہے

تم یاد مجھے آ جاتے ہو

جب چار نگاہیں کرکے کوئی محوِ تبسّم ہوتا ہے

جب کوئی محبت کا مارا اس کیف میں پڑ کر کھوتا ہے

تم یاد مجھے آ جاتے ہو

افلاک پہ جب یہ لاکھوں تارے جگ مگ جگ مگ کرتے ہیں

جب تارے گن گن کر دل والے ٹھنڈی سانسیں بھرتے ہیں

تم یاد مجھے آ جاتے ہو

جب رات کا بڑھتا ہے سنّاٹا، چین سے دنیا سوتی ہے

تب آنکھ مِری کھل جاتی ہے اور دل کی رگ رگ روتی ہے

تم یاد مجھے آ جاتے ہو

جب روتا ہے بہزادِ حزیں وہ شاعر وہ دیوانہ سا

وہ دل والا وہ سودائی وہ دنیا سے بیگانہ سا

تم یاد مجھے آ جاتے ہو

بہزاد لکھنوی