نبی کا شہر بلاتا تھا راہِ محکم سے

عارفانہ کلام نعتیہ کلام

 نبیﷺ کا شہر بلاتا تھا راہِ محکم سے

وہ راہ ہو کے گزرتی تھی چشمِ پُرنم سے

مجھے پہنچنا تھا یثرب ربیعِ اول تک

ورود کی تھی اجازت مگر محرم سے

سفر طویل تھا رہوار بھی تھکا ہوا تھا

کوئی درخت نظر میں نہ تھا کئی دم سے

قریب مشک کا پانی بھی ختم ہو رہا تھا

دعائے آب لبوں پر تھی ربِ زمزم سے

جو پوٹلی میں تھے جَو کے بھُنے ہوئے دانے

وہی تھے بھوک کے زخموں کو ایک مرہم سے

میں ایک شاعرِ ہندی تھا اور حجاز میں تھا

میں چاہتا تھا ملاقات شاہِ عالمﷺ سے

محلۂ بنی ہاشم ہے کس طرف بھائی

پتا یہ پوچھتا تھا زید ابنِ ارقم سے

مجھے وہ فاتحِ خیبر کے در تلک لے آئے

بڑی ہی عزت و شفقت سے شاد و خرم سے

لوائے حمد کے سائے نے دھوپ کجلا دی

ملے ہیں جوں ہی علمدارِ فوجِ حق ہم سے

علیؑ کے ساتھ ہی پھر مسجدِ نبیﷺ آیا 

پھر ایک نور رگوں میں اتر گیا جھم سے

سلام عرض کیا شہرِ علمﷺ کو میں نے

جواب دے کے کہا کہ نجات ہو غم سے

ازل ابد پہ نظر ہے تِرا تعارف کیا

کمیل جانتا ہوں تجھ کو قبلِ آدمؑ سے

کھجور باغِ فدک کے مجھے عطا ہوئے پھر

جنابِ صل علی و آلہ وسلم سے

جدھر علیؑ ہیں ادھر حق ہے کہہ رہے تھے وہ

یہی حدیث سنی تھی رسولِ اکرمﷺ سے

پھر اس کے بعد مِری آنکھ کھل گئی فوراً 

یہ ایک خوابِ سعادت تھا فیضِ پہیم سے

کمیل شفیق رضوی