اپنی وسعت سے کہیں دور سمٹ جاتا ہوں

 اپنی وسعت سے کہیں دُور سمٹ جاتا ہوں

میں تِری راہ کا پتھر ہوں تو ہٹ جاتا ہوں

بیٹھا رہتا ہوں میں سہما ہوا گم صم اور پھر

اپنی تنہائی سے خود آپ لپٹ جاتا ہوں

عجب آہستہ روی پر ہے مِرا پائے رواں

تیز چلتا ہوں تو رفتار سے گھٹ جاتا ہوں

پھیلتا ہے رخِ افلاک پہ جب غازۂ شام

پارہ پارہ تِرے اطراف میں بٹ جاتا ہوں

ابر پارہ ہوں تو رہتا ہوں یونہی سایہ فگن

صورتِ گرد اگر ہوں تو میں چَھٹ جاتا ہوں

صرف بے وجہ اداسی ہے، نہیں مَصرفِ خاص

یونہی بے کار میں آیا تھا، پلٹ جاتا ہوں

نیند کی شیلف سے خوابوں کی اٹھا کر میں بیاض

پڑھتا کب ہوں؟ فقط اوراق الٹ جاتا ہوں

میں نہتّا کسی تنہا سے نہیں لڑتا کبھی

لاؤ٭ لشکر ہو مقابل میں تو ڈٹ جاتا ہوں

مشکل ایسا ہوں کہ تعمیر نہیں ہوتا سروش

سہل اتنا ہوں کہ اک چوٹ سے کٹ جاتا ہوں

اجمل سروش

٭لاؤ لشکر: غلط العام لفظ ہے اصل میں یہ لاد لشکر ہے