دیر تک بیٹھے ہوئے دونوں نے بارش دیکھی

 دونوں

دیر تک بیٹھے ہوئے دونوں نے بارش دیکھی

وہ دکھاتی تھی مجھے بجلی کے تاروں پہ لٹکتی ہوئی بوندیں

جو تعاقب میں تھیں اِک دوسرے کے

اور اک دوسرے کو چُھوتے ہی تاروں سے ٹپک جاتی تھیں

مجھ کو یہ فکر کہ بجلی کا کرنٹ

چُھو گیا ننگی کسی تار سے 

تو آگ کے لگ جانے کا باعث ہو گا

اس نے کاغذ کی کئی کشتیاں پانی پر اتاریں

اور یہ کہہ کے بہا دیں کہ سمندر میں ملیں گے

مجھ کو یہ فکر کہ اس بار بھی سیلاب کا پانی

کود کے اُترے گا کہسار سے جب

توڑ کے لے جائے گا یہ کچے کنارے

اوک میں بھر کے وہ برسات کا پانی

اَدھ بھری جھیلوں کو ترساتی رہی

وہ بہت چھوٹی تھی، کمسن تھی

وہ معصوم بہت تھی

آبشاروں کے ترنم پہ قدم رکھتی تھی 

اور گونجتی تھی

اور میں عمر کے افکار میں گم

تجربے ہمراہ لیے

ساتھ ہی ساتھ میں بہتا ہوا، چلتا ہوا، بہتا گیا

گلزار