میری پلکوں پہ خواب رہنے دے
کچھ نہ کچھ اِضطراب رہنے دے
حق بیانی تو میرا شیوہ ہے
مجھ کو زیرِ عتاب رہنے دے
تجھ کو فُرصت ملے تو پڑھ لینا
مجھ کو مثلِ کتاب رہنے دے
تیری آنکھیں تو خود نشیلی ہیں
ذکرِ جام و شراب رہنے دے
تشنگی جب مِرا مقدر ہے
میرے حق میں سراب رہنے دے
کوئی آیا ہے سج کے گُلشن میں
آج ذکرِ گُلاب رہنے دے
لکھ دے واعظ گُناہ سب مجھ پر
نام اپنے ثواب رہنے دے
زندگی تو حباب ہے صارم
اب مجھے تو حباب رہنے دے
عذیق الرحمٰن صارم
No comments:
Post a Comment