نشان رفتگاں ابتر کھڑے ہیں

 نشانِ رفتگاں ابتر کھڑے ہیں

فصیلیں گر گئیں ہیں در کھڑے ہیں

پسِ منظر کوئی طوفان ہو گا

کہ دم سادھے ہوئے منظر کھڑے ہیں

ہمی نے اس کے ترکش کو بھرا تھا

مگر ہم بھی نشانے پر کھڑے ہیں

سُنا ہے آج وہ باتیں کرے گا

سماعت کے لیے پتھر کھڑے ہیں

بہت سے سر کشیدہ دار پر ہیں

جو باقی ہیں خمیدہ سر کھڑے ہیں

ہم اپنا قد بڑھا کر کیا کریں گے

غنیمت ہے کہ پیروں پر کھڑے ہیں

ہزراروں لوگ مےخانے میں اشعر

امیدِ قطرۂ مئے پر کھڑے ہیں

علی مطہر اشعر