نگاہ مجھ سے ملاؤ تو کچھ کلام کروں

نگاہ مجھ سے ملاؤ تو کچھ کلام کروں

نقاب رخ سے ہٹاؤ تو کچھ کلام کروں

فلک مقام تمہارا، میں نقشِ پا ٹھہرا

یہ فاصلہ جو مٹاؤ تو کچھ کلام کروں

مِرے ہی دل میں رہو، دل کے حکمراں بن کر

مجھی سے مجھ کو چراؤ تو کچھ کلام کروں

سرورِ عشق میں کھو کر جو نغمۂ الفت

مِرے ہی نام کا گاؤ تو کچھ کلام کروں

مِرے فراق کے قصے جو بزمِ یاراں میں

زباں سے اپنی سناؤ تو کچھ کلام کروں

چمن میں رنگِ بہاراں ہے چار سُو پھیلا

کہیں سے تم بھی جو آؤ تو کچھ کلام کروں

حیات زینؔ کی مانگے ہے ہر دعا میں تجھے

جو اس کا ساتھ نبھاؤ تو کچھ کلام کروں

اشتیاق زین