جلترنگ مجھے وہ گیت بھاتا ہے

جلترنگ

مجھے وہ گیت بھاتا ہے

جو صرف اور صرف

تیرے نام سے منسوب ہو جاۓ

کہ جس میں صرف تیرا تذکرہ ہو

تیرا چرچا ہو

مجھے وہ رنگ بھاتا ہے

کہ جس کو خاص دن اور خاص موقعے پر

مِری جاں تم نے پہنا ہو

وہ منظر میری آنکھوں کو

بہت شاداب کرتے ہیں

کہ جن کو تم نے دیکھا ہو

مجھے وہ پھول بھاتے ہیں

کہ جو تیری وجہ سے

کھلکھلاتے، لہلہاتے، مسکراتے ہیں

تِرے ہونٹوں سے جو خوشبو چراتے ہیں

اگر تم مسکراؤ تو

زمانے مسکراتے ہیں

ستارے، چاند، آنکھیں

پھول، ساون، رنگ

خوشبو، دھڑکنیں دل کی

سبھی منظر خوشی سے جھومتے ہیں

گیت گاتے ہیں

مِرے الفاظ بھی شعروں میں ڈھل کر

گیت گاتے ہیں

مِری جاناں میں کیا لکھوں 

کہاں تک بولتا جاؤں 

تِری تعریف کرنے سے

مِرے الفاظ قاصر ہیں 

عبدالرحمان واصف