طویل نظم پرچھائیں کا چوتھا حصہ

پرچھائیاں

طویل نظم پرچھائیں کا چوتھا حصہ

سورج کے لہو میں لتھڑی ہوئی وہ شام ہے اب تک یاد مجھے

چاہت کے سنہرے خوابوں کا انجام ہے اب تک یاد مجھے

اس شام مجھے معلوم ہوا کھیتوں کی طرح اس دنیا میں

سہمی ہوئی دوشیزاؤں کی مُسکان بھی بیچی جاتی ہے

اس شام مجھے معلوم ہوا اس کارگہِ زرداری میں

دو بھولی بھالی روحوں کی پہچان بھی بیچی جاتی ہے

اس شام مجھے معلوم ہوا جب باپ کی کھیتی چِھن جائے

ممتا کے سنہرے خوابوں کی انمول نشانی بکتی ہے

اس شام مجھے معلوم ہوا جب بھائی جنگ میں کام آئیں

سرمائے کے قحبہ خانے میں بہنوں کی جوانی بکتی ہے

سورج کے لہو میں لتھڑی ہوئی وہ شام ہے اب تک یاد مجھے

چاہت کے سنہرے خوابوں کا انجام ہے اب تک یاد مجھے

تم آج ہزاروں میل یہاں سے دور کہیں تنہائی میں

یا بزم طرب آرائی میں

میرے سپنے بنتی ہو گی بیٹھی آغوش پرائی میں

اور میں سینے میں غم لے کر دن رات مشقت کرتا ہوں

جینے کی خاطر مرتا ہوں

اپنے فن کو رُسوا کر کے اغیار کا دامن بھرتا ہوں

مجبور ہوں میں، مجبور ہو تم، مجبور یہ دنیا ساری ہے

تن کا دکھ من پر بھاری ہے

اس دور میں جینے کی قیمت یا دار و رسن یا خواری ہے

میں دار و رسن تک جا نہ سکا، تم جہد کی حد تک آ نہ سکیں

چاہا تو مگر اپنا نہ سکیں

جینے کو جئے جاتے ہیں مگر سانسوں میں چتائیں جلتی ہیں

خاموش وفائیں جلتی ہیں

اور آج جب ان پیڑوں کے تلے پھر دو سائے لہرائے ہیں

پھر دو دل ملنے آئے ہیں

پھر موت کی اندھی اٹھی ہے پھر جنگ کے بدل چھائے ہیں

میں سوچ رہا ہوں ان کا بھی اپنی ہی طرح انجام نہ ہو

ان کا بھی جنوں ناکام نہ ہو

ان کے بھی مقدر میں لکھی، اک خون سے لتھڑی شام نہ ہو

سورج کے لہو میں لتھڑی ہوئی وہ شام ہے اب تک یاد مجھے

چاہت کے سنہرے خوابوں کا انجام ہے اب تک یاد مجھے

ساحر لدھیانوی