ہم محنت کش جگ والوں سے جب اپنا حصہ مانگیں گے

 ہم محنت کش جگ والوں سے جب اپنا حصہ مانگیں گے

اک کھیت نہیں، اک دیس نہیں، ہم ساری دنیا مانگیں گے

یاں ساگر ساگر موتی ہیں یاں پربت پربت ہیرے ہیں

یہ سارا مال ہمارا ہے،۔ ہم سارا خزانہ مانگیں گے

جو خون بہا جو باغ اُجڑے جو گیت دلوں میں قتل ہوئے

ہر قطرے کا ہر غنچے کا، ہر گیت کا بدلہ مانگیں گے

یہ سیٹھ، بیوپاری، رجواڑے، دس لاکھ تو ہم دس لاکھ کروڑ

یہ کتنے دن امریکہ سے جینے کا سہارا مانگیں گے

جب صف سیدھی ہو جائے گی جب سب جھگڑے مٹ جائیں گے

ہم ہر اک دیس کے جھنڈے پر اک لال ستارہ مانگیں گے

ہم محنت کش جگ والوں سے جب اپنا حصہ مانگیں گے

اک کھیت نہیں، اک دیس نہیں، ہم ساری دنیا مانگیں گے

فیض احمد فیض