خرد کی قید میں لائے گئے تواتر سے
ہم ایسے وحشی سِدھائے گئے تواتر سے
نہ جانے کتنے عقائد ہمارے ذہنوں میں
سُنا سُنا کے بِٹھائے گئے تواتر سے
وگرنہ کام کوئی مستقل کیا ہی نہیں
بس اک گلی میں ہم آئے گئے تواتر سے
اک ایک کر کے بجھائے گئے چراغ یہاں
ہمارے لاشے اُٹھائے گئے تواتر سے
قدم بھی اُٹھنے سے انکار کب تلک کرتے
جب ایک سمت بلائے گئے تواتر سے
گمان تک بھی نہ گزرا کہ نیند ٹُوٹے گی
مجھے یوں خواب دکھائے گئے تواتر سے
بنانے والے کو خود بھی یہی پسند آئے
سو عام لوگ بنائے گئے تواتر سے
اسد رحمان
No comments:
Post a Comment