عجب ہے صورتِ حالات فی امان اللہ
کٹھن ہوئی گزر اوقات، فی امان اللہ
گزر رہا ہے گلی سے وہ خوفناک آسیب
لرز رہے ہیں مکانات، فی امان اللہ
تمام شہر کے رونق کدے ہوئے ویران
ہیں سوگوار مضافات، فی امان اللہ
پڑے ہوئے ہیں سرِ راہ بے کفن لاشے
گِنی نہ جا سکیں اموات، فی امان اللہ
تُو رو رہا ہے تِرے گھر کا پھول مُرجھایا
اُجڑ گئے مِرے باغات، فی امان اللہ
طلوعِ صبح کے آثار دیکھنے والو
طویل ہونے لگی رات، فی امان اللہ
نہ جانے کب سجے پھر بزمِ دوستاں،یارو
نہ جانے کب ہو ملاقات، فی امان اللہ
تِرا مزاج بہت ہو گیا ہے جھگڑالو
دلِ گزیدۂ صدمات، فی امان اللہ
ٹھنی رہے گی یہاں خیر و شر کی آپس میں
بپا رہیں گے فسادات، فی امان اللہ
نصیب اب فتن و شر تِرا زمینِ کُہن
مبارزت گہِ طبقات، فی امان اللہ
ہر ایک سُورۂ ردِ بلا کا وِرد کرو
پڑھو صحیفۂ آیات، فی امان اللہ
درِ قبول سے ٹکرا کے سر بُریدہ سروش
پلٹ رہی ہیں مناجات، فی امان اللہ
اجمل سروش
No comments:
Post a Comment