کبھی کبھی تو دل کہتا ہے

 اب کے کچھ پیسے آئیں تو

سب سے پہلے

اس دھرتی کو رنگ کرنا ہے

چھت کو ہلکا نیلا کر کے

کہیں کہیں پہ سُرخی مائل عکس بھی ہوں تو

ٹھیک رہے گا

دیواروں پر کچی دھوپ کی روپہلی کرنوں ایسی

دُھلی سفیدی بھی کرنی ہے

درزیں ساری بھر دینی ہیں

جتنا بوجھ ہے چھت پر، اس کو

نیچے لا کر رکھ دینا ہے

دروازے میں کان پڑی ہے

اس چوکھٹ کے چاروں کونے

اپنے بازو چھوڑ رہے ہیں

چُولیں اس کی تڑخ گئی ہیں

اس کمرے کی دیواروں پر

کتنے جالے تنے ہوئے ہیں

سب سے پہلے

ایک دِیے کو روشن کر کے

اس کے طاق میں رکھ دینا ہے

کبھی کبھی تو دل کہتا ہے

کیا یہ سب کچھ نئے سرے سے بن سکتا ہے

لیکن

اتنا وقت کہاں ہے

عابد خورشید