سارے موسم تو گئے زرد بنا کر مجھ کو

سارے موسم تو گئے زرد بنا کر مجھ کو
تُو بہاروں کا خدا ہے تو ہرا کر مجھ کو
دیر سے گم ہوں میں بچپن کے ہرے جنگل میں
لے گئی تتلی کہاں ساتھ اڑا کر مجھ کو
جل رہا ہوں تِرے اندر کسی مشعل کی طرح
ڈوب جائے گا اندھیروں میں بجھا کر مجھ کو
دم گھٹا جاتا ہے اڑتی ہوئی مٹی میں مرا
اور تُو خوش ہے دریچے میں سجا کر مجھ کو
جب تعلق ہی نہیں کوئی مِرا ساحل سے
چاہے لے جائے جہاں لہر بہا کر مجھ کو
خود بخود سوکھ کے گر جاؤں گا خاورؔ میں بھی
کوئی دن اور نہ ٹہنی سے جدا کر مجھ کو

خاقان خاور