جس کو دیکھ کے شاعر تم للچائے بہت
اس میں بھی تھی روشنی کم اور سائے بہت
آئینے کا سحر ہے یا اندازِ نظر
اپنا عکس ہی اپنے روپ دکھائے بہت
کل جو چہرہ نظر نظر کا محور تھا
جوڑے میں جو پھول تھا کل اب گود میں ہے
دیکھ کے اس کو بیتے دن یاد آئے بہت
تجھ سے تھا پیمانِ وفا، سو قائم ہے
پھول سے لوگوں نے پتھر برسائے بہت
چہرے کی خاموش لکیریں کہتی ہیں
شرط سخن ہے، کہنے کا پیرائے بہت
ہونٹوں پر اک زخمِ تبسم آج بھی ہے
جسموں کی تکفین نے راز چھپائے بہت
بہرے جذبے روح کی چیخیں کیا سنتے
ٹھنڈی پٹڑی ریل تلے چلائے بہت
حبس سہی، کمرے میں رہو تو اچھا ہے
باہر تازہ ہوا تو دھول اڑائے بہت
اپنے وطن میں وہ سچا ہے، جو یارو
سچائی کو جھوٹے منہ بہلائے بہت
شاعرؔ اپنے گھر کا خدا ہی حافظ ہے
اس گھر کو ہیں گھیرے ہوئے ہمسائے بہت
حمایت علی شاعر
No comments:
Post a Comment