کیا کیا دئیے ہیں زیست نے غم کچھ نہ پوچھیے
کتنے کیے گئے ہیں کرم کچھ نہ پوچھیے
آنکھوں میں اشک لب پہ تبسم جگر میں سوز
کیسے رکھا ہے غم کا بھرم کچھ نہ پوچھیے
اک پیکر حسیں کی پرستش کے واسطے
کیا کیا تراشے ہم نے صنم کچھ نہ پوچھیے
اس دور ابتلاء میں بہ ایں عقل و آگہی
بے چارگیٔ اہلِ قلم کچھ نہ پوچھیے
پہنچا کہاں کہاں میں خدا کی تلاش میں
اے ناظرین دیر و حرم کچھ نہ پوچھیے
ان دونوں منزلوں سے ذرا سوچتا ہوں میں
مجھ سے مِرا وجود و عدم کچھ نہ پوچھیے
اس مختصر سی زیست میں باسط عظیم نے
کیا کیا اٹھائے بار الم کچھ نہ پوچھیے
باسط عظیم
No comments:
Post a Comment