خوشی دے کے وہ مجھ کو غم دے رہے ہیں

خوشی دے کے وہ مجھ کو غم دے رہے ہیں

مسلسل فریبِ کرم دے رہے ہیں

بڑا خوب صورت ہے پیمانِ الفت

مجھی کو وہ میری قسم دے رہے ہیں

یہ طرزِ محبت مبارک ہو تم کو

تمہیں لوگ دادِ ستم دے رہے ہیں

یہ دنیا جنہیں راہزن کہہ رہی ہے

مِرا ساتھ تو کم سے کم دے رہے ہیں

تکلف سہی دنیا والوں سے تم کو

مگر اب تو آواز ہم دے رہے ہیں

میں ان کی جوانی پہ مائل ہوں انجم

مجھے لوگ کیوں جامِ جم دے رہے ہیں

انجم سہارنپوری