نکلنا غیر ممکن سا ہے ان کی زلف پیچاں سے
تعلق بڑھ رہا ہے آج کل زنجیرِ زنداں سے
پرستارِ جمال و حسن جب پہنچا سرِ محشر
تو حوروں نے کئے اس کو اشارے باغِ رضواں سے
نشیمن کا ہر اک تنکا جھلس جانے کو ہے مضطر
خدا کے واسطے کہہ دے کوئی برقِ سوزاں سے
نگاہِ لطف سے میری طرف دیکھو نہ محفل میں
کہیں محروم ہو جاؤں نہ رنج و درد و حرماں سے
مشامِ جاں معطر ہو گیا، غنچے کھلے دل کے
شمیم آئی، نسیم آئی، یہ کون آیا گلستاں سے
نبھانا بھی تمہیں آتا ہے یا آنکھیں لڑانا ہی
کبھی اے راز پوچھوں گا میں یہ چشمِ بیناں سے
راز لائلپوری
No comments:
Post a Comment